|
Mauxro
La Torre:
Kion
ni bezonas por kio?
Dum
la venontaj monatoj en Esperantujo oni diskutos pri la nova Strategia Plano de
UEA, fin-aprobota dum la venontjara Universala Kongreso en Zagrebo. Tiu
plano volas dauxrigi multajn celojn kaj realigojn de la gxisnuna Kampanjo 2000,
tamen repripensante ilin en pli bone strukturita sistemo. La
mez-perspektiva plano analizas la agadon por esperanto laux 3 tavoloj: komprenigo,
paroligo, utiligo de la Internacia Lingvo. La plano ankaux identigas 3
strategiajn prioritatojn: profesiigxo, plijunigxo, tutmondigxo. (sekvas tabelo) Evidente
ni, kiel instruista asocio, estas grave koncernataj de tiaj tavoloj kaj
prioritatoj! Ekzemple,
por bone “komprenigi” – en la instrueja medio – kio estas
Esperanto kaj kia gxia eduka valoro, ni devas almenaux plani nian informan
agadon, elektante plej tauxgajn informkanalojn kaj konvenajn enhavojn. Simile
por “paroligi” Esperanton, ni devas disponigi allogajn kaj efikajn
lernilojn, kaj arangxi oportunajn lern-okazojn. Se temas pri instruista “utiligo”
de Esperanto, ni devas helpi la uzadon de la lingvo por interkultura edukado kaj
por faka scienca kunlaborado, k.t.p. Krome
en tiuj samaj tavoloj ni devus prioritati la aspektojn de profesieco, tutmondeco
kaj juneco. Kompreneble
ni ne povas nun elcxerpi la analizon de niaj celoj, prioritatoj, kaj bezonoj.
Tio bezonas iom da tempo kaj gxi estos la unua tasko, kiu okupos nin dum la
venontaj monatoj je cxiuj asociaj niveloj: en la estraro de ILEI, en gxiaj
komisionoj, en la landaj sekcioj kaj en la komitato. Sed
simpla diskutado pri laborplano kaj gxeneralaj celoj povas resti abstrakta
ekzerco de niaj mensaj kapabloj, se gxi ne tradukigxas en konkretaj kaj
realismaj decidoj kaj plenumaj agoj. Samtempe
ni devas fortikigi niajn organojn, komencante cxe nia internacia estraro kaj
dauxrigante cxe la lokaj estraroj kiuj regas la landajn aux regionajn sekciojn. Tamen
elekti estraranojn ne signifas nur trovi ajnajn bonvolemulojn, ial pretaj
kunlabori en la tiradon de la cxaro. Se ni volas agi celkonscie kaj provizante
nin per la necesaj rimedoj, ni devas klare esprimi niajn plej urgxajn bezonojn,
ni devas publike difini niajn taskarojn kaj konsekvence sercxi homojn kiuj
kapablas kaj povas surpreni almenaux parton de la plej urgxaj taskoj. Kiel
vi legas en la dua kovrilpagxo de IPR, nun ILEI disponas je nur 5 estraranojn:
M. La Torre (prezidanto), S. MacGill (vicprezidanto), M. Evlogieva (sekretario),
J. Bishop (vicsekretario), kaj B. Kim Lindblom (kasisto). La plenumindaj
estraraj taskoj (kiuj post la difino kaj precizigo de nia Strategia Plano
certe kreskos) jam abunde superas la fortojn de tiu kvinopo, kiu konsistas –
ni ne forgesu tion – el volontuloj, jam sxargxitaj per siaj profesiaj okupoj. Do
ni nepre bezonas tuj ekpensi pri la kompletigo de la internacia estraro, kiu
lauxstatute povas konsisti el 7 homoj. Alivorte ni povas tuj malfermi kampanjon
por kolekti kandidatigojn por 2 estraraj lokoj. “Bone, sed por kiuj taskoj?”
vi demandos. Pri tio la jamaj estroj kaj kunlaborantoj jam plurfoje plurforme
diskutis, alvenante al la konkludo ke la taskaroj, por kiuj ni prioritate
bezonas respondeculojn estas: lerneja kaj universitata agado, trejnado
instruistoj, eksteraj rilatoj, kaj instruscienca esplorado. Tial
ni sercxas kandidatojn por kompletigi la estraron en tiuj sektoroj. Kompreneble
por cxiu taskaro oni povos poste ankaux starigi apartan laborgrupon (aux
komisionon), kiu kunlaboru kun la koncerna estrarano; sed por cxiu taskaro ni
bezonas respondecan estraranon aux komisiiton. ALVOKO POR KANDIDATIGO1) ILEI sercxas kandidatojn por la elekto de novaj (aldonaj)
estraranoj, kiuj estas pretaj okupigxi (kaj respondeci) pri unu (aux
pluraj) el la jenaj laborkampoj: –
lerneja agado; –
universitata agado; –
trejnado de Esperanto-instruistoj; –
instruscienca esplorado; –
flegado de eksteraj rilatoj. La sekcioj, la komitatanoj kaj ecx unuopaj membroj bonvolu sendi kandidatigojn
antaux la 20-a de oktobro 2000 al la sekretario, Mariana Evlogieva. Krom la nomo de la kandidato bonvolu kunsendi etan vivprotokolon
(biografieton), kie evidentigxu la rilatoj de la proponata homo kun la supre
menciitaj sektoroj. 2) La balotado por elekti la du novajn estraranojn okazos
dum venontaj oktobro kaj novembro, post la diskonigo de kolektitaj
kandidatecoj. ATENTU! Homoj,
kiuj interesigxus eventuale kunlabori en la estraro (aux kun la
estraro!) en la diritaj kampoj, kaj kiuj kompreneble deziras pli detalajn
klarigojn pri la koncernaj farendajxoj, bonvolu korespondi pri tio kun la
prezidanto aux vicprezidanto, ankaux per la diskutejo ILEI-kad, plej
baldaux reaktivigota. Koncerne
nian rolon en la aprobota Strategia Laborplano de UEA, tre bonvenos
leteraj kaj artikolaj kontribuoj por la venontaj numeroj de IPR, krom en niaj
internaciaj retaj diskutejoj, en la landaj bultenoj, kaj en cxiaj renkontigxoj.
|