|
Internacia Ligo de Esperantistaj Instruistoj. ...ni instruas Esperante! |
|
| Novaĵoj |
ILEI-lernejoj: ĉu realigebla ideo?
ILEI-lernejoj: ĉu realigebla ideo? La 16-an de aprilo 2005 en Czajowice, Pollando, estis subskribita Interkonsento inter la lernejo de Czajowice kaj ILEI, laŭ kiu ILEI iĝis oficiala patrono de la lernejo. La Pola Sekcio de ILEI, kiu tre proksime kunlaboras kun la lernejo ekde aŭg. 2004, daŭrigos la kunlaboron kiel reprezentanto de ILEI. La plano estas kunordigi ĉiujn lernejojn en Pollando kie Esperanto estas instruata kaj utiligata.
La subskribo okazis dum komuna E-Konferenco de la Pola Sekcio de ILEI kaj la Studenta Scienca E-Rondo de Jagelona Universitato en Krakovo kun partopreno de la gastigantoj: Direkcio de la lernejo en Ĉajovice kaj loĝantoj de la vilaĝo. Ĉeestis reprezentantoj de la vilaĝestro, de Krakova Societo Esperanto, de la vojevodia filio de Pola Esperanto-Asocio en Krakovo, de la E-Klubo de Krzeszowice, ĉajovicaj instruistinoj kaj lernantoj, la direktorino kaj infanoj lernantaj E-on en la bazlernejo de la apuda vilaĝo Bębło, entute pli ol 80 personoj.
La centra motivo de la konferenco estis la homaj universalaj valoroj, kiujn lernado de E-o enkondukas en lernejon. La interkonsenton pri patroneco subskribis la direktorino de la lernejo, Agnieszka Basista kaj, nome de ILEI, la ILEI-komitatanino, Maria Majerczak. Post la manpremo estis tralegita la speciala salutmesaĝo de la Prezidanto de ILEI, Radojica Petrović, kaj interŝanĝitaj simbolaj donacetoj: floro, kun simbolaj signifoj de la koloroj kaj longdaŭreco de la planto, kaj ringo kun la verda stelo simbolanta gvidadon kaj kunigadon. Dum la ceremonio regis tre solena kaj ĝoja etoso. La tutan aranĝon planis kaj kunordigis Maria Majerczak. Foto-raporto aperos rete.
La sfero de la kunlaboro difinita per la interkonsento estas edukado, sen financaj devigoj. Ĝi ligiĝas al universalaj kaj ĉiutempaj valoroj de Esperanto, kiuj estas komuna komprentereno de la esperantistoj kun la aliaj homoj. Krom tiuj, la Internacia Lingvo proponas al la lernejoj ĉiam kreskantan nombron kaj rangon de praktikaj uzoj. Ĉie ekzistas homoj malfermaj, larĝmensaj, aktivaj, ofte ne sciantaj pri tiuj ebloj, ravitaj ekkoninte ilin, kaj pretaj utiligi Esperanton.
Tio pli vaste malfermas la vojon al la ĉefa agadtereno de ILEI – la lernejoj. Ni informu! Ni instruu! Tio inspiris la kunlaboron de la pola sekcio kun la lernejo de Czajowice, kiu nun, per la interkonsento pri patroneco, fariĝis ILEI-lernejo. Tio jam sugestas pozitivan respondon al la titola demando. Ĉu ĉiu sekcio de ILEI povas fari ion similan? Ĉu ni povos krei tutmondan reton de ILEI-lernejoj? Certe jes, se ĉiu sekcio faros tion en sia lando.
© Internacia Ligo de Esperantistaj Instruistoj