ILEI aktiva en jubilea kongreso

Antaux cent jaroj en la urbo Ceret la unua kataluna Esperanto-asocio estis fondita de Paul Berthelot. Tial okazis jxus tie la 32a Kataluna Kongreso de Esperanto. Tiu tri-taga evento logis centon da partoprenantoj. Cxefe literaturo kaj instruado figuris en la faka programo kaj ILEI kontribuis al la dua per du engagxigxoj de vic-prezidanto, Stefan MacGill.

Unue, li gvidis du-tagan tri-horan atelieron; cxiuj 15 lokoj estis okupitaj. La programo inkluzivis paran ekzercon ligi gramatikajxojn kun komunikaj kapabloj, prezenton kaj diskuton de skemo instrui la transitivecon de verboj, realigon de rol-ludo pri la aventuroj de E-spiono 005 (rezulto de lastaj tri okazigoj: Esperantistoj 1, Volapukistoj 2), rigardon al paroliga, kunlaboriga tasko kaj diskuton kiel reteni lernantojn en libervolaj kursoj.

Due, li prelegis dum 70 minutoj kun 20 minutoj da diskuto pri la temo "Cxu Esperanto havas didaktikan gramatikon?". La demando estis respondita jese, sed kun aldono ke evoluo de pliaj kaj pli bonaj gramatikaj sxtuparoj eblas kaj indas. Krome, la ecoj de situaci-komunika instruado venis sub la lupeon. Resumo de tiu prelego, kaj du apogaj materialoj por la ateliero estas elsxuteblaj en PDF-formato el la kongresa hejmpagxo: http://www.esperanto-ct.org/c/novetats/32KKE_Ceret.htm
La literaturan parton prizorgis cxefe Aleksander Kojxenkov, de la eldonejo Sezonoj kaj revuo Ondo de Esperanto, kiu interalie prelegis pri la verkoj de Cxehov. Kvar katalun-lingvaj libroj estis lancxitaj. Arno Lagrange prezentis la nunan staton de la Vikipedia projekto. Kantis Jxak Le Puil, Kaj Tiel Plu kaj la duo Jomart kaj Natasxa. Teatro-Trupo de Tuluzo prezentis komedion "Familia etoso" de Agnes Jaoui kaj Jean-Pierre Bacri en traduko de Rikardo Cash.

SMG