Aliĝilo por la 59-a Kongreso.

Listo de aliĝintoj.

En 2026 la Kongreso de ILEI okazos ĉe Zaozhuang-a Universitato, en urbo Zaozhuang de Shandong-Provinco de Ĉinio, de la 10-a ĝis la 16-a de julio. La evento okazos kunlabore kun la Universitato mem, kiu estas sidejo de la plej granda Esperanto-Muzeo de Azio kaj de la sola Esperanto-fako nuntempe aktiva oficiale agnoskata de la Ĉina Registaro. La temo de la Kongreso estas "Eduki profesiajn esperantistojn kaj protekti Esperanto-kulturon",  dum la Simpozio esploros pli science la temon "Plialtigi lingvan konscion", tre gravan en tempoj de A.I. La unuaj tagoj de la Kongreso havos buntan preleg-programon, inkluzive de tri seminarioj pri la kongresa temo kaj de du-taga Simpozio kun la partopreno de doktoroj kaj profesoroj el diversaj landoj. La lastaj tri tagoj de la Kongreso estos tute dediĉitaj al la esplorado de la kultur-riĉa provinco Shandong, hejmloko de famaj filozofoj kiel Konfuceo kaj Mozi.

Bonvolu rapide aliĝi per la formularo: https://forms.gle/LVbz3WHLfAnrZbFA6

Kio estas ILEI?

Internacia Ligo de Esperantistaj Instruistoj (ILEI) estas la ĉefa agadejo por Esperante parolantaj instruistoj kaj edukistoj de Esperanto. Krom esti memstara asocio, ILEI estas aliĝinta faka asocio de Universala Esperanto-Asocio kaj ĝi havas 37 landajn sekciojn kaj membrojn en pli ol 70. Vidu kelkajn hejmpaĝojn: Aŭstralio, Brazilo, Finnlando, Francio, Germanio, Hungario, Usono kaj Kanado.

Kiuj estu membroj en ILEI?

Studentoj kaj instruistoj membriĝu en ILEI! Ankaŭ se vi volas subteni la instruadon de Esperanto kaj interkulturan edukadon, tiukaze vi estu membro de ILEI!

Jen la aliĝ-formularo por iĝi membro de ILEI.

Jen detalaj informoj pri kiel membriĝi.

(Atentu, post mallonga teknika paŭzo, denove eblas pagi ankaŭ tra la banka konto de ILEI. La kontonumeron vi povas trovi en la formularoj de ILEI-membriĝo, en la abonilo de Juna Amiko kaj en la paĝo https://www.ilei.info/membrigxo.php.)

Kion ILEI-membriĝo ofertas al vi?

1. Ilustrita revuo, Internacia Pedagogia Revuo (IPR), aperanta kvarfoje jare, prezentante nivelajn fakajn artikolojn kaj Ligajn novaĵojn. Ĝia livero estas inkluzivita en la membreco.
2. Ĉiujara internacia Kongreso kun fakaj prelegoj en kolega etoso.
3. Rabata abono por supermembroj al revuo Juna Amiko, tre utila por komencantoj, kun allogaj legaĵoj por legemuloj inter 10- kaj 100-jaraĝaj.
4. La eblo posti viajn videojn en la mojosa jutuba kanalo de ILEI https://www.youtube.com/@EsperantoEdukadoILEI/featured

 

Ĉu vi volas legi la organon de ILEI? Membriĝu, kaj vi regule ricevos ĝian organon, Internacia Pedagogia Revuo (IPR). Jen IPR 2024/1.