Kio estas ILEI?

Internacia Ligo de Esperantistaj Instruistoj (ILEI) estas la ĉefa kolektiĝejo por instruistoj kaj edukistoj de Esperanto. ILEI estas aliĝinta faka asocio de Universala Esperanto-Asocio kaj ĝi havas sekciojn en pli ol 40 landoj kaj membrojn en pli ol 70. Kelkaj sekcioj havas propran hejmpaĝon: vidu ĉe Aŭstralio, Brazilo, Finnlando, Francio, Germanio, Hungario, Katalunio, Usono kaj Kanado.

Kiuj estu membroj en ILEI?

Se vi instruas Esperanton, aŭ se vi estas instruisto de aliaj lingvoj aŭ fakoj kaj volas interŝanĝi spertojn kun alilingvaj kolegoj en Esperanto, aŭ se vi estas junulo kaj volas gvidi kursojn en aranĝoj, kluboj aŭ per la reto, aŭ se vi havas spertojn en trejnado de instruistoj, flego de ekzamen-sistemoj, reta kaj distanca lernado kaj similaj kampoj, aŭ se vi volas subteni la instruadon de Esperanto kaj interkultura edukado, tiukaze vi estu membro de ILEI!
Jen informoj kiel membriĝi.

Kion ILEI ofertas al vi?

• Ilustrita revuo, Internacia Pedagogia Revuo (IPR), aperanta kvarfoje jare, sume kun 160 paĝoj, prezentante nivelajn fakajn artikolojn kaj Ligajn novaĵojn. Ĝia livero estas inkluzivita en la membreco.
• Ĉiujara internacia Kongreso kun fakaj prelegoj en kolegeca etoso.
• Abonebla revuo, Juna Amiko, kun allogaj legaĵoj por iuj legemuloj inter 10 kaj 100-jaraĝaj. ILEI-membroj povas aboni ghin kun rabato, ili estas superaj membroj.

La nova eldono de la Manlibro pri Instruado de Esperanto aperis. Mendu ĝin ĉe: https://manlibro.ikso.net/

La 56-a ILEI-KONGRESO

Tempo: Ekde la 5-a ĝis la12-a de aŭgusto 2023

Loko: Linjano Orsabla (Itale: Lignano Sabbiadoro), Italio

Ĉef-temo de la Kongreso: "Instrui Esperanton en lernejoj"

Retejo de la Kongreso: https://2023.kongreso.org/

Por aliĝi klaku ĉi tie: https://2023.kongreso.org/alighilo.php

Jen la ligilo por rekte eniri la paĝon por informoj: https://2023.kongreso.org/ILEI_chefa.php

Ligo al la kompleta alvoko

Fotoj de Linjano Orsabla

Novaĵoj